Job 13

1“Atĩrĩrĩ, maitho makwa nĩmonete maũndũ macio mothe,
matũ makwa nĩmamaiguĩte na magataũkĩrwo nĩmo.
2 ^aŨrĩa mũũĩ o na niĩ nĩnjũũĩ;
mũtirĩ oogĩ kũngĩra.
3No niĩ ndĩrenda kwaria na Mwene-Hinya-Wothe,
na ngerirĩria gũciira na Mũrungu.
4 ^bNo inyuĩ-rĩ, mũranjigĩrĩra ndeto cia maheeni;
inyuothe mũrĩ athondekani a tũhũ!
5 ^cNaarĩ korwo mwakira ki!
Ũndũ ũcio ũngĩtuĩka ũũgĩ harĩ inyuĩ.
6Na rĩrĩ, thikĩrĩriai kĩhooto gĩakwa;
iguai gũthaithana kwa mĩromo yakwa.
7Kaĩ mũngĩaria ũũru mũkĩarĩrĩria Mũrungu?
Kaĩ mũngĩaria maheeni igũrũ rĩake?
8 ^dKaĩ mũngĩmuonia kĩmenyano?
Kaĩ mũgũciirĩrĩra Mũrungu?
9Angĩmũtuĩria inyuĩ-rĩ, ũndũ ũcio no ũtuĩke mwega?
No mũmũheenie ta ũrĩa mũngĩheenia mũndũ?
10 ^eTi-itherũ no amũrũithie
mũngĩtuĩka a kuonania kĩmenyano na hitho.
11 ^fHĩ, riiri wake ndũngĩmũmakia?
Mũtingĩnyiitwo nĩ guoya nĩ ũndũ wake?
12 ^gMĩario yanyu ya ũũgĩ nĩ thimo hũthũ o ta mũhu;
ihooto cianyu no ta kwĩgitĩra na rĩũmba.

13“Kirai ki, mũreke njarie;
o ũrĩa ndĩrĩona-rĩ, rekei nyone.
14Nĩ kĩĩ gĩgũtũma ndĩtoonyie ũgwati-inĩ
na ngaiga muoyo wakwa moko-inĩ makwa?
15 ^hO na angĩnjũraga-rĩ, niĩ nowe ndĩrĩĩhokaga;
na ti-itherũ nĩ ngatetera mĩthiĩre yakwa hau mbere yake.
16 ⁱTi-itherũ, ũndũ ũyũ noguo ũgaatuĩka wa kũũhonokia,
nĩgũkorwo mũndũ ũtooĩ Ngai ndangĩũmĩrĩria gũũka mbere yake!
17Thikĩrĩriai wega ũhoro wakwa;
matũ manyu nĩmakĩigue ũrĩa nguuga.
18 ^jTi-itherũ nĩhaarĩirie ciira wakwa,
na nĩnjũũĩ nĩ nguoneka ndĩ wa kĩhooto.
19Nĩ kũrĩ mũndũ ũngĩhota gũũthitanga?
Angĩkorwo nĩ kũrĩ-rĩ, no gũkira ngũkira ngue.

20“Wee Ngai, ta kĩĩhe o maũndũ maya meerĩ,
na ndigũcooka gũkwĩhitha:
21 ^kAtĩrĩ, eheria guoko gwaku, gũikare kũraya na niĩ,
na ũtige kũũmakia na imakania ciaku.
22 ^lNingĩ ũnjĩte na nĩngwĩtĩka,
kana ũkĩreke njarie, nawe ũnjookerie.
23 ^mNĩ mahĩtia na mehia maigana niĩ njĩkĩte?
Nyonia ihĩtia na rĩĩhia rĩakwa.
24Ũraahitha ũthiũ waku nĩkĩ,
na ũkandua thũ yaku?
25 ⁿNĩũngĩnyamaria ithangũ rĩrahurutwo nĩ rũhuho?
Nĩũgũtengʼerania na maragara momũ?
26 ^oNĩgũkorwo nĩ wandĩkĩte maũndũ marũrũ ma kũnjũkĩrĩra,
na ũkaangaĩra igai rĩa mehia ma ũnini wakwa.
27 ^pWohaga magũrũ makwa na mĩnyororo;
ũrangagĩra njĩra ciakwa ciothe
na ũndũ wa gũcora njoro makinya ma magũrũ makwa.

28 ^q“Nĩ ũndũ ũcio mũndũ amocaga ta kĩndũ kĩbuthĩte,
agathira ta nguo ĩrĩĩtwo nĩ memenyi.